Grau, Villa, conceyu
y alredores de la zona Centru-occidental d’Asturies.
Esta páxina quier ser un espeyu de les sos costumes, del sentir
y del vivir de la so xente y de la rellación hestórico-cultural
colos pueblos de los sos alredores.
Dende la Meseta hasta’l mar allúganse la Pola
Somiedu,
Teberga, Quirós, Belmonte, Yernes
y Tameza, Proaza, Salas,
Santu Adrianu, Uviéu, Pravia, Candamu, Les
Regueres, Cuideiru,
Muros, Sotu’l Barcu y Avilés.
Son éstos, los conceyos centro-occidentales d’Asturies los
que tuvieron una más fonda rellación con Grau a lo llargu
de la hestoria, tanto pola xeografía, como pola necesidá de
cubrise les carencies mutuamente. Estos conceyos dieron-y los recursos
del mar, como’l pescáu; los del monte como’l ganáu,
y tamién otros como’l comerciu y los productos de la tierra.
Grado – Grau/Grao
Esti conceyu ta allugáu na fastera centro-occidental d’Asturies
y ta atravesáu pol cursu medio del ríu Nalón. Llenda
al norte colos conceyos de Candamo y Les Regueres, al este con Proaza, Santu
Adrianu y Uviéu, al sur con Teberga y Yernes
y Tameza, y al ueste con Belmonte y Salas.
Grau, ta perbién comunicáu poles carreteres N-634 que cruza’l
conceyu d’ueste a este y pasa pol centru de la villa, y l’autovía
A66 que ta tovía en proceso de construccion. Tou esto fae que
la situación de Grau seya privilexada ya que ta namás a
20 km, o a 20 minutos del centru d’Uviéu.
El conceyu ye abondo accidentáu, con un relieve de transición,
dende los más de 1.200 metros de les zones altes del Valle’l
ríu Cubia a les vegues de Santa María, Anzo y Grau, asitiaes
perbaxo de los 50 metros. La mayor parte de la xente concéntrase
nestes muncho bones vegues del Nalón y del Cubia, que tán
recorríes por una red viaria a la vera la cual disponense aldees
y caseríos esparcíos. El paisaxe ye fundamentalmente rural
y tá dominau por praos, paciones y güertos, nos que los característicos
minifundios tan llendaos por muries de piedra. Les parroquies
de Tolinas, Las Villas y Villamarín tan dientro del Paisaxe Protexío
del Picu Caldoveiro, integráu por especies autóctones ente
las qu’atopamos carbayos, fayas y bidules, y onde vive una fauna
compuesta por corzos, xabariles, venaos, urogallos, nutrias ya incluso
dellos osos pardos. La Veiga Grau, formada polas homónimas de
Peñaflor, La Mata -onde s’asienta la villa que da nome al
conceyu- y Pereda, constitúi una enorme y rica vega, d’unos
ocho kilómetros de llargo por tres d’ancho, con unes condiciones
microclimáticas de mayor humedá qu’el resto’l
territoriu, debío a la influencia de los ríos Nalón
y Cubia.
Cuenta con un mercáu tradicional tolos miércoles y domingos
que trespasa les llendes comarcales. Tien tamién delles feries
ganaderes a lo llargo’l añu, lo que vien siendo una bona
manifestación del puxu que’l sector primario tien tovía
na so economía. |
